handitu

trintxerpe » MUSIKA

Arrasaten garaile izan da Illunbe

Pasaia Musikaleko akordeoi taldeak lehen postua eskuratu zuen

alain maya

Trintxerpeko Illunbe akordeoi orkestrak, Arrasateko akordeoi lehiaketa irabazi du asteburuan. Jose Juan Zubiriagak zuzendutako orkestrak 30 minutuko saioa eskaini zuen; bertan Tomas Aragasen El triplete vasco eta Gerald Mohren Fantasia Iberica piezak eskaini zituzten.

Arrasateko akordeoi lehiaketa oso entzutetsua da, bertan Errusia, Txina, Frantzia eta Finlandiako akordeoi joleak izan ziren, besteak beste. Akordeoi taldeen modalitatean, berriz, bi parte hartzaile izan ziren, eta Trintxerpeko taldeak Andoaingo akordeoi taldea garaitu zuen.

«Ez dugu lan handiegia egin»

Garaipen honek, 2000. urtetik utzita zituzten lehiaketetera itzultzeko indarra eman dio Illunberi: «6 urte dira Suitzan izan ginen lehiaketatik, akordeoi taldeen txapelketa batean parte hartzen ez dugula. Garaipen honekin jendea animatu egin da, eta ziurrenik udan Europako lehiaketa batean hartuko dugu parte».

Urrian hasi ziren Arrasateko lehiaketa prestatzen, baina ez dituzte, hala ere, ordu gehiegi eman entseatzen. «Eskaini beharreko bi kantuak ez ziren berriak guretzat, eta horregatik ez genuen lan gehiegi egin. Moldaketa batzuk nahikoak izan ziren lehiaketara aurkezteko».

Bide berri bat zabaldu da

Bestalde, garaipen honek ate asko zabaldu dizkio Trintxerpeko akordeoi taldeari. «Dagoeneko Rialeko (Lleida) jaialdi garrantzitsuan parte hartzeko gonbita luzatu digute. Oso garrantzitsua da hori. Izan ere, lehiaketetan postu onak lortzea ederra da, baina jendea gehien betetzen duena, kontzertuak ematea da. Curriculuma betetzeak kontzertuak lortzen lagunduko digu», azaldu du Illunbeko zuzendariak.

IIlunbe akordeoi taldea 24 akordeoi jole eta perkusionistek osatzen dute gaur egun. «Talde polita dago, eta taldearen % 100a entseguetara joateak asko laguntzen du maila on bat lortzeko», azaldu du Jose Juan Zubiriaga zuzendariak. «Hemendik aurrera gogor egingo dugu lan kontzertuak prestatzeko», gaineratu du.